OLMADI

Aprel 29, 2008 0:57, Şeirlər, sabiroghlu, Şərhlər(3)

Hər ürəyə yüklənmədim,

Hər dərd ilə təklənmədim.

Nahaq zilə köklənmədim,

Bəmim olmadı.

Ayım, ilim məndən ötdü,

Kirkirə tək gün üyütdüm.

Özümdə bir "Mən" böyütdüm,

Mənim olmadı.

Qəlbimi şuma döndərdim,

Hər nə əkdim şer dərdim.

Öldü neçə şer dərdim,

Qəmim olmadı.

Baxtıma çox qara yaxdım,

Nə verdisə daşa çaxdım.

Bağışladı məni baxtım,

Qənim olmadı.